بو بهاری موینم ؟!

                                             به : محتشم

بو بْْهاری مَوینم ؟ ْ

سَوزَه داری مَوینم؟

جنگلی تورکَه سُوکُون

قَْرو قالی مَوینم ؟

چْه بوام آخ چه بوام ؟

چْمْه آخ نازَه برا

وَختی سَوزَه

 زمستونی وری بْن

زیزانَه سینه پِچَک

 بِْْهاری را

  خلِه کر :

«زمستون بَرشَه بِْرا

پرومَه سَوزَه سَْرا »

میشین و پفچالی لولْ

 دَوَسْتَه جا

 پَرچینی وَر

 خْتَه داری مَوینْم؟

***

چْمْه دل تَنگَه

  خَسار دَوَسْتَه شَه

بْلبلی ـ

 غومْچَه آبِه نی ، مَستَه شَه

ـ حاج حاجی زودی اومَه ـ

چَمَه کَه مین داری کو

 قشنگینَه

گْلَه باری بَستَه شَه

ـ شَوتاوینَه شَوی کو

 تا سحر سوکْله خونی

  لاوَه کریم

کولَه باری قورصَه نی ـ

 مْرا پَس آخَشتَه شَه

اْسَه ک غُربَتی کَش دَکَردَمَه

دورادور قورصَه را کَش آکَردَمَه

چَپَرهَ پِشتی هوا

 چَی رْباری مَوینْم ؟

***

کی واتَه قورصَه دَواشون

  ساختَه یَه ؟

قورصَه ـ

 صَد نالَه دْلْش ، دَباخْتَه یَه

زَیرونَه دْل دِ کابَه ؟

هَمَه دْل ـ

 قورصَه جابَه !

شَختَه ژَندَه دْلی را

 غَمی بَرینگاه آبَه

سینه کو کیل پارَه بَه

جنگلی دارون مینَه

  بْلبلَه آوارَه بَه

دَشت و کوه تاسیینَه

 بْو زْهاری مَوینْم ؟

***

سا آلَنْگَه جانی رو

 تنگ و تاریکْ آبَه روز

کورَقو ـ

 سا داری سَر

 شَوی خواوی چاکْنْه

ـ جیکْ لَه کو تَنخاوُ تاک

ـ فانْسی داورو بَری

ـ نازینَه دوش دَری یَه

شَواپَر آستمونی

 سییاه رو چینگ دَکَرْ

مَنگی قَر کَردَشَه ، شَه

اْسْتارِه ن بَرمَه نینَه

بُو مَگَم اْم هَمَه چْی

 اینتظاری مَوینْم؟

***